تغييرات جلدية ام سرطان لا قدر الله


استفسار لو سمحتوا : انا سافرت للسعودية بقالى 15 يوم و من ساعتها و انا بيجرالى حاجات غريبة ياريت تفيدونى . انا اساسا كان عندى حساسية موسمية بتيجى فى شهر 3 و 4 و بتسببلى بقع حمراءء فى الجلد و حكة شديدة جدا و احيانا بثور صغيره و كل دة بيروح بمجرد البعد عن الشمس او الحرارة او اى مصدر للقلق او خلافه و بداية من شهر 5 ببقى طبيعى جدا و اقف فى اى شمس و فى اى حر و لا يفرق معايا . و معاد سفرى جه فى شهر 4 و فعلا اتوكلت على الله و سافرت و سلمت امرى لله اول م بدات انزل مواقع بحكم شغلى كمهندس جالى جفاف فى دراعى اليمين و الشمال فى مكان معين منهم و كشفت و اخدت كريم دهنت منه و بدات تستجيب الحمد لله .
المشكلة بقى فى حاجة تانية اهم من يومين تلاتة لقيت كمية حسنات بتظهر فى دراعى و صدرى و ظهرى و فى الخصية كمان و روحت كشفت عند دكتورة قالتلى بعد الشر عنكوا جميعا دى بداية سرطان جلد ميلانويا و من ساعتها و انا مش عارف اعيش حياتى يوم واحد لا اكل و لا شرب و اللى باكله برجعه و بقيت اغصب نفسى على الترجيع علشان ارتاح لانى المعدة عندى عصبيه و القولون كمان . و مرة و انا برجع لقيت زى دم نازل مع مخاط فحد قالى ممكن يكون دة علشان انت غصبت على نفسك فجرحت المرئ . و لون البول فى يوم كام محمر جدا او قريب للبرتقالى .
المهم روحت لاستشارى كبير و كشفت عنده قعد يضحك قالى يا ابنى انسى كل الكلام دة متفكرش فيه كل دى حاجات طبيعيه و بتظهر للناس كلها و هو نفسه ماليان منها . قالى كل واحد متبرمج انه يظهرله عدد معين من الحسنات دى و فى اللى بيظهر على مراحل و فيه اللى بيظهر عنده مرة واحدة و دة اللى جننى و خلانى اعصابى تفلت بصراحة . قالى انا هكتبلك على صن بلوك بس تدهنه على وشك علشان متكترش فى وشك لكن فى باقى الجسم البس بكم و خلاص و متقلقش و لما قلتله على لون البول دة طلب تحاليل صورة دم كاملة و انزيمات كبد و بتاع 3 انواع كمان كلهم الحمد لله تمام باستثناء تحليل البول طلع فيه نسبه كرات حمراء فى البول 6-8 و قال بسيطة و سالت واحد قريبى دكتور قالى متشتغلش بالك مش مستاهله دة معدل طبيعى . . من ساعه الموضوع دة و انا جوايا خوف و وسواس شديد مسيطر عليا و للاسف الحسنات دى منها اللى طلع فى وشى و عرفت انها مش هتروح تانى و هتفضل معايا و كل شوية ابص على جسمى و اراقب اللى طلع و بقيت مرووش بالمعنى الحرفى للكلمة . ياريت تساعدونى انا مش عارف اعمل ايه و متغرب و لوحدى فى السكن مش قدامى غيركوا اكلموا . و منتظر ردكوا جدا جدا جدا .
مع العلم انى قبل المواضيع دى بكام يوم كنت اخدت حباية كومتريكس بتاع الام الحلق و البرد و هو معروف انه شديد فبصراحة مبقيتش عارف ايه السبب و لا ايه اللى بيحصل هل تغيير الاكل و المكان و انى سافرت فى شهر 4 اللى اساسا جلدى فيه ضعيف هو السبب و لا الحباية اللى اخدتها دى و لا الشمس و لا دة طبيعى و كدة كدة كان هيحصل . ….مع العلم ان الحسنات دى فى مستوى اجلد و مفيش اى حكة او الم فيها و اكشتشفتها بالصدفة . الغريبة الى عاوز افهمه لو سمحتوا انى اشتغلت فى مصر فى شهر 5 اللى فات فى مواقع و الشمس كانت كارثية بس وشى كله اسود و جلدى قشر و اخدت لون طبيعى للجلد من تانى و كله تمام اشمعنه لما جيت هنا دة محصلش و بقت حتت تغمق كدة ” الحسنات ” وحتت عادية مش فيها حاجة و الجفاف اللى معايا دة افضل حل له ايه .و الحسنات دى هتفضل تظهر و لا هى بتظهر مرة واحدة و خلاص مش فاهم اى حاجة فى اى حاجة و مش عارف استنى فى السعودية و لسه حرها مظهرش بيقولوا فى شهر 6 و 7 الموضوع بيبقى صعب جدا و لا ارجع مصر بدل م يحصل حاجة تانية و لا اعمل ايه ارجوكوا ردوا عليا و جزاكم الله خيرا


0 تعليقات

لن يتم نشر عنوان بريدك الإلكتروني. الحقول الإلزامية مشار إليها بـ *