بخاف من الدمار والحرب بترعب من صوت الطيارات ولما بسمعه بحس ان الحرب هتقوم وان فى صواريخ هتنزل علينا تدمر كل شئ ودايما بشوف كوابيس ان كل شئ حواليا مدمر وان معدش فى الدنيا حد غيرى رغم انى مواليد 94 يعنى معشتش فترة حرب اصلا ليه بخاف منها كده مش عارفة
نفسى احس بالامان !! دايما حاسة بخوف ودايما بتخيل ان هيهجم علينا ناس مسلحين ويقتلونا فى بيتنا .
دايما حاسة ان فى شخص مستخبى فى بيتنا وبيراقبنى ! باستمرار حاسة الاحساس ده وبترعب لما اكون فى البيت لوحدى ,بترعب ان الشخص ده يعرف انى عارفة بوجوده فيهاجمنى علشان كده عمرى ماحكيت لحد عنه
بخاف اوى من الضلمة وعمرى ما بنام لوحدى ابدا
اى تعب بسيط بحس بيه بترعب ان يكون عندى مرض خطير وببقى عاوزة اكشف واعمل تحاليل وبترعب اكتر لو ماما او بابا او حد من اخواتى تعب بخاف من مجرد تخيل انى ممكن افقد حد منهم
بحب حاجاتى اوى وبخاف من ضياعاها لدرجة انى بحلم دايما ان فى حرب او زلزال وان البيت بيقع واننا بنضطر نسيب البيت وببقى موجوعة اوى على حاجاتى اللى بسيبها ,, محتفظة بحاجات غريبة علشان بخاف ارمى اى حاجة قديمة زى علب فاضية او حتى اقلام خلصت او لعب مكسورة بحس دايما انى ممكن احتاجها فبخاف ارميها
بخاف اطلع من البيت من غير ما يكون معايا حبوب مسكنه ولصق جروح ومقص وخيط وابرة وحاجات زة كده يعنى لدرجة ان صحابى لما بيحتاجو اى حاجة غريبة او غير متوقع احتياجها بيجوا يسالونى انا عليها
بقعد اتخيل دايما انى فجأة صرخت فى اى حد يعنى ابقى قاعدة فى البيت وفجأة اتخيل انى بصرخ فى ماما او بابا , ابقى فى الكلية واتخيل نفسى بصرخ فى وش حد من صحابى او حد من الدكاترة بتوعى او حتى ابقى فى الشارع او مواصلة ,, بخاف اوى من نفسى وبحس انى فجأة هعمل كده من غير سبب وبقعد افكر انا لو عملت كده هتصرف ازاى او هبرر ده ازاى
بخاف اخد اى قرار فى حياتى مهما كانت اهميته كبيرة او صغيرة . بخاف ادخل فى اى نقاش علشان محدش ينتقدنى علشان كده مش اجتماعية لدرجة انى لما بتكلم مع حد من صحابى على ( الفيس بوك ) مش بيبقوا مصدقين ان دى انا علشان انا بقدر اعبر عن نفسى بالكتابة اسهل بكتير من الكلام مباشرة
انا تعبت من الخوف والقلق انا بتوتر من اى حاجة ومن اقل حاجة
انا عنندى (كحة ) من وانا صغيرة مش بتروح كنت بكشف واخد علاج وبردو مفيش فايدة لحد قريب لما دكتور قالى ان سببها نفسى مش عضوى وفعلا اخدت بالى انى مش بكح وانا نايمة وانها بتزيد اوى فى اوقات التوتر الزيادة , انا تعبت من الكحة دى بحس انها بتاخد روحى معاها
وبيجيلى نوبات خوف غريبة , ببقى قاعدة كده فى امان الله فجأة احس بخوف شديد من ايه معرفش ومغص بقى فى بطنى ومش ببقى قادرة اتنفس بحس وقتها ان روحى بتطلع .. بيبقى احساس صعب وبيوجع اوى ومش بقدر اتحكم فيه
لما بتعب واتوتر بحس بهيجان فى جسمى كله بفضل اهبد فى الارض واخبط بايدى على اى حاجة قدامى وببقى عاوزة اصرخ واكسر اى حاجة
لما بتضايق بميل دايما لانى أأذى نفسى , مرة جرحت صوابعى بسكينة ومرة كسرت كوب وجرحت ايدى بالزجاج المكسور وغيرها كتير , وقتها مش ببقى قادرة اسيطر على نفسى حتى مش بحس بوجع مكان الجرح
المشكلة انى معدتش بقدر اعمل كده علشان ربنا ميزعلش منى وفى نفس الوقت ببقى مش قادرة اسيطر على اعصابى وبحس انى بتقطع من جوايا
انا مخنوقة وجوايا كلام كتير اوى متلغبط ومش عارفة اقوله ازاى .. من كتر ما كتمت جوايا سنين معدتش عارفة افضفض واطلع الكلام اللى خانقنى وتاعبنى .. اعمل ايه علشان اتخلص من الخوف والحزن والوجع اللى جوايا
انا عندى 20 سنة وحاسة انى عجزت اوى من جوة !!
0 تعليقات