ابني متاخر في الكلام ارجو المساعده

لو سمحت يا دكتور ابني عنده سنه و 7 شهور بيقول كلمات غير مفهومه و بيقول بابا و ماما و دادا لكن مش واضح هل فعلا يقصدني و هو بيقول ماما .. او يقصد بابا فعلا و هو بيقول بابا ولا لأ .. و بيقلدنا في بعض الحاجات زي يروح يخبط على الباب او لما جرس الباب بيرن يقول مين  .. لما بيحب حد يشيله بيقول اوبا بدل اوبح .. ساعات بلاحظ انه بيحاول يقلدنا و احنا بنتكلم او يقلد اغنيه اطفال في التليفزيون لكن الكلام بيطلع خرابيط مالهاش علاقه باللي بيحاول يقلده… لما الاذان بيأذن بيرفع ايده و يقول ابا ابا اللي هي الله اكبر الله اكبر … بيحب يلعب بالتليفون و التابلت و محمله لعب اطفال بيعرف يلعبها بس هي سهله و بيعرف يدوس على الالوان و على الاشكال اللي بتطلعله بالضبط  يعني بينشن و لما بتيجي لعبه هو عرفها بيبقى عارف امتى يدوس و امتى يستنى و لما بيزهق بيدوس على الزرار اللي بيقفل اللي هو زرار الهوم .. انا حاسس انه ذكي بس هو متاخر عن باقي اطفال العائله اللي في سنه بيقولوا اكل و رز و عارفين كلمات اكتر منه هو بيقول بو بو على كل حاجه اكل و ماء و لبن و مش عارف يعني ايه هات او تعالى او جايز عارف بس بينفض علشان هو عايز يعمل حاجه تانيه … مع تكرار كلمه تفاحه قدامه بيقول عليها حه بس و عارف يعني ايه كوره جون و بيروح يدور على الكوره و بيجبها علشان نلعب …. هو اتاخر شويه في الزحف على الشهر العاشر و المشي على سنه .. وحمايا بيقولي ان زوجي كان كده و هو صغير كان كلامه قليل … كده هو طبيعي و لا ايه ؟ و امتى ابتدي اقلق عند سن ايه ؟